Laerskool Koue Bokkeveld is ‘n skool waar die fokus lê op wat die skool vir die kind kan beteken en nie wat die kind vir die skool beteken nie. Ons skool bied sonder twyfel vir elke kind geleenthede tot groei en ontwikkeling.

Kinders by Laerskool Koue Bokkeveld word gekoester en versorg soos ‘n jong boompie met liefde en individuele aandag wat mens nie sommer by skole met groot getalle kry nie. In die pragtige natuurskoon waar ons skool geleë is en geborge in ons groot skoolterrein, kry ons kinders geleentheid om kind te bly, gesond te wees én buite te ontwikkel.

Met kernwaardes soos omgee, eerlikheid, verantwoordelikheid, uitnemendheid en respek word ons kinders op die regte pad geplaas om ‘n gebalanseerde en produktiewe deel van die gemeenskap te word.

Hier by Laerskool Koue Bokkeveld groet ons mekaar nog met die hand en menswees en goeie maniere is iets wat nie net oor gepraat word nie, maar ‘n lewenstyl is.

Ons sien uit daarna om u te ontmoet en beter te leer ken. Kom raak deel van ons skoolfamilie. U menswees en persoonlike talente, kennis en ervaring sal ‘n wonderlike toevoeging tot ons gemeenskap wees.

Beste wense
P.G. de Bruyn